Tsjin de stream yn

Tsjin de stream yn

Neat is minskliker as derby hearre wolle. Binnen in groep falle fielt feilich. Ek in soad jongeren fan no sykje hâldfêst en struktuer. Troch meardere grutte krisissen, digitalisearring en in ûnwisse ekonomy gripe se nei konservative stânpunten. Mar der binne noch altyd (jonge) minsken dy’t it oars – faak ynklusiver en duorsumer – dogge as eardere generaasjes. Dizze non-konformisten, dwerstinkers en rebellen meitsje – tsjin de stream yn – har eigen karren. Bygelyks op it mêd fan wenjen, wurkjen en ûnderwiis.

Tekst: Berber van Oyen | Yllustraasje: Illustraties van Meij / Evie Mariek Meij

Basic libje

In kwart fan de jongerein dy’t noch thús wennet wol stjerrende graach ferhúzje, mar kin gjin wenning fine. Foar har, mar bygelyks ek foar hierders dy’t keapje wolle, binne der inisjativen lykas de kollektive selsboubeweging CrowdBuilding. Ek ûntstean der wenmienskippen en kieze minsken foar in tiny house. Noch los fan de digital nomads dy’t mei har camper Europa ûnfeilich meitsje om basic te libjen en te wurkjen op ôfstân. Dat is allegear hiel wat oars as in tradisjoneel boud hûs mei in giga-hypoteek!

Struken rêde

Kinst dyn plak en manier fan wurkjen feroarje, mar pioniers op de gewoane wurkflier binne ek hurd nedich. Sa waard Tikkie betocht yn 2016 troch in lyts team binnen ABN AMRO om it werombeteljen fan lytse bedraggen makliker te meitsjen. Tsien jier letter is it de grutste betel-app fan Nederlân! Der binne ek komplete disruptive bedriuwen, dy’t konvinsjes trochbrekke. Tink neist kolossen as Airbnb, Uber en Netflix oan in sympatyk inisjatyf lykas Struikroven. Sy rêde planten en struken dy’t drige te ferdwinen by sloop of renovaasje fan wenwiken.

Skriften en krytsjes

Werom nei eartiids kin ek sûnder konvinsjonele bysmaak. In comeback fan wat earder ek goed wie. Kassettebantsjes en finylplaten binne al langer wer yn ’e moade, mar begjin dit jier iepene keunstner Pet van de Luijtgaarden sels in tydlike fideoteek yn Utrecht! Wat echts yn hannen hawwe, fertrage, moetsje: hiel noflik foar de minske. Ek wurde ûnder oaren yn Denemarken en Nederlân de foardielen fan offline ûnderwiis op ’e nij ûntdutsen. Skriften en krytsjes blike in segen foar konsintraasje en hânskrift.