Skiermûntseach makket him op foar it literatuerfestival Meet Me at the Lighthouse, fan 18 oant en mei 20 novimber. It is de earste kear dat it festival plakfynt. Der binne noch kaarten beskikber.
Skriuwers, muzikanten en oare dielnimmers oan it festival binne Lisa Weeda, Mariken Heitman, Joost Oomen, Miek Zwamborn, Sholeh Rezazadeh, Peter Zantingh, Nina Polak, Bauke Vermaas, Koos Dijksterhuis, Alara Adilow, Jaap Robben, Ellen de Bruin, Fiep van Bodegom , Huib Henrichs, Kaspar, Deniz Kavafoglu, Erik Jansen, Puck van Dijk, Maarten Bronts, Michael ter Maat, Esmé van der Boom, Marjolein van der Elburg, Gerard Beentjes, Femke Essink en Ruben Jacobs.
Yn lêzingen, petearen, ynterviews, kuiers en lêsklups komme tema’s as natuer, ekology, klimaat, toerisme en identiteit oan bod. Skiermûntseach is in dekor, ynspiraasje en petearûnderwerp.
Is der in dichter op ‘e boat?
It festival begjint al op de boat. Op ferskate farren fan en nei Skiermûntseach is in live ferrassingsoptreden fan in dielnimmer oan it festival plak. Der binne mear ferrassende eleminten. Sawol freed- as sneontejûn wurdt de jûn ôfsletten yn Hotel van der Werff, dêr’t festival- en eilângasten traktearre wurde op literatuer. Dichters oan de bar, muzikanten oan de taap; it kin alle kanten út!
Ekstra eleminten yn it programma
Yn oktober makke de organisaasje it programma bekend: fjouwer lêsklups, fjouwer literêre programma’s (lêzingen, ynterviews, muzyk) en trije iepenloftprogramma’s. Oan it festival binne ekstra eleminten tafoege. Der is in ekstra lêsklup mei Sholeh Rezazadeh, har debútroman De hemel is altijd paars kaam op de longlist fan de Libris Literatuurprijs. Lykas by de oare lêsklups mei Lisa Weeda, Mariken Heitman en Peter Zantingh, giet de skriuwer yn in petear mei lêzers. It festival biedt de skoallen op Skiermûntseach ek in edukatyf programma: Natascha Stenvert (ûnder oaren bekend fan Kolletje) en Maren Stoffels (dy’t jierliks op sa’n 150 skoallen is) binne op 18 novimber op basisskoalle Yn den Mande. Maren Stoffels komt yn desimber werom nei de middelbere skoalle, de Inspector Boelensschool.
Droegen troch it eilân
Meet Me at the Lighthouse wurket gear mei Natuurmonumenten, VVV Schiermonnikoog, Soepboer Fietsverhuur, Wagenborg Passenger Services en Lifestyle & Boeken Kolstein. Dy lit alle boeken fan de dielnimmende skriuwers yn de winkel en online sjen en ek ferkeapet de boeken op it festival. It festival wurdt foar in part mei mooglik makke troch Kleur aan Zee Skiermûntseach, de gemeente Skiermûntseach, Stichting MAPS, Iepen Mienskipfûns en it Waddenfonds.
