Marrit Jellema, sûnt 2024 stedsdichter fan Ljouwert, komt dit neijier mei har debútroman Mag ik eindelijk liggen? It boek ferskynt yn oktober by Uitgeverij Passage. Marrit Jellema (Snits, 1993) is skriuwer en spoken word artyst. Mei har yndrukwekkende poadiumperformances krige se yn de ôfrûne jierren in grut publyk, net allinnich yn it noarden mar ek dêrbûten. Foar ien dy’t noch debutearje moat, luts Jellema ferskate kearen de oandacht fan de media. Dêrby gie it behalve oer har wurk ek oer har rûzige, troch ferslaving tekene tienerjierren.
Yn Mag ik eindelijk liggen? folgje we in jonge frou dy’t in fertocht soad liket op de skriuwer sels. Beide binne stedsdichter fan in provinsjehaadstêd, en beiden binne as gefolch fan in drege jeugd, in frijwat kompleks brein en de te betide dea fan harren mem yn in depresje rekke.
Sa ûntstiet in portret fan ien dy’t wrakselet mei de wurking fan har brein en mei wat sosjaal passend is en wat net. De ferteller grypt har fêst oan dingen dêr’t se wól kontrôle oer hat: har uterlik, hygiëne, beleefdheidsfoarmen en it twangmjittich kontrolearjen fan har hûs op ynkringers. It boek is in gewaagd tragikomysk drama oer it meunster dat depresje hjit.
De roman ferskynt by Utjouwerij Passage, ek bekend fan útienrinnende Nederlânske auteurs as Anjet Daanje en Meindert Talma.
