Krekt as yn de earste edysje fan kultuermanifestaasje Arcadia, brochten wy ek no hûndert dagen lang in grut literêr projekt. Dêrfoar waard der gearwurke mei 100 auteurs, mar ek mei in soad oare makkers en organisaasjes. Wy hawwe de feiten op in rychje set. Wêr kamen de skriuwers wei? Yn hokker foarmen dûkten de teksten op en hoefolle minsken seagen dat?
54 froulju en 46 manlju skreaunen in tekst foar Lyts gelok. De jongste is berne yn 2012, de âldste yn 1947.
De auteurs mochten sels har sjenre kieze. Dat smiet 44 ferhalen, 41 gedichten, 11 essays, 2 strips, 1 liet en 1 performance op.
40 skriuwers kamen út Fryslân, 33 út de rest fan Nederlân, 9 út Flaanderen, 12 út kollega-Cities of Literature (Barcelona, Bucheon, Durban, Heidelberg, Jakarta, Melbourne, Okayama, Quebec, Reykjavik, Slemani, Tartu en Vilnius) en der wienen 6 oare, ynternasjonale auteurs. Fan de ynternasjonale auteurs kamen der 2 út Noard-Amearika, 1 út Súd-Amearika, 1 út Afrika, 1 út Oseanië, 4 út Azië en 9 út Europa.
Der is skreaun yn 15 ferskillende talen, wêrfan 52 teksten yn it Nederlânsk, 25 yn it Frysk, 2 yn it Biltsk (Fryske streektaal), 8 yn it Ingelsk, 2 yn it Frânsk en 2 yn it Spaansk. Dêrneist komme de neikommende talen allegear 1 x foar: Katalaansk, Dútsk, Yslânsk, Japansk, Koreaansk, Letsk, Litousk, Sloveensk en Nederlânske Gebeartetaal.
De webside kleingeluk.frl mei alle teksten waard yn de rintiid fan it projekt 20.079 kear besocht troch 10.204 ferskillende besikers. Yn totaal 1.878 minsken krigen op in stuit de deistige geloksmail yn de inbox. De posts en stoarjes op Facebook en Instagram waarden 431.151 kear werjûn en berikten 88.624 persoanen
Fragminten fan teksten of komplete ferhalen dûkten op 100 ferskillende wizen op. Dêrby wurken wy gear mei keunstners, foarmjouwers en ûnderskate lytse en grutte organisaasjes. De haadfoarmen by de ferskinings wienen:
Der wienen live en online optredens by bygelyks literêre eveneminten Dichter op de Deel en Hoge Woorden. Der wiene ek ferrassingsoptredens: op de fearboat nei Skiermûntseach, yn Bouwurk en op Omrop Fryslân radio. Tegearre seagen (of hearden) om de 12.000 besikers hinne dizze optredens.
Folsleine teksten wienen te lêzen yn literêre tydskriften de Moanne en Ensafh. Ek yn hûs-oan-hûs-kranten fan Groot Media en Mediahuis en yn tydskrift Heit & Mem waarden teksten ôfprinte. Mei-inoar hienen dizze útjeften in oplage fan mear as 600.000 stiks.
‘Moving targets’ neamden wy se: bewegende ferskiningsfoarmen. Lykas in bestickere bus fan Qbuzz, in skerm yn Arriva-treinen, in buordsje op in fyts en in lesauto, stickers op kentekens fan auto’s. Mar ek in seil op in Pean-falk, in ‘sleep’ efter in fleantúch en in sitaat op sportshirts. Wy skatte it berik op goed 8.500 ‘spotters’.
Mei in protte hannen is it wurk samar dien. Letterlik! Hiel wat keunstners gienen foar Lyts gelok oan ’e gong. Se pleatsten in fragmint op it Observeum, projektearren op Museum Belvédère, skreaunen yn sân en op hûd, groeven in sin út, ferbylden yn miniatuer en makken faaskes. Goed 3.000 minsken makken dit mei.
Fansels kinst ek reklame ynkeapje. Dat dienen we dan ek. Men koe teksten tsjinkomme op in ledskerm, by Slieker, op de útlienbon fan dbieb, op beurtbalkjes, op buorden by de rûnwei del en op makelersbuorden. De utering op de liftflierren fan parkeargaraazje Aldehou is der noch hieltyd. Mei-inoar berikten dy foarmen grif 21.000 minsken.
By dizze foarm ferskynden letterlik teksten op produkten of media fan partnerorganisaasjes. In pear foarbylden: in fragmint op bier fan Fortuna, wyn fan Frison, tee by It Famke en ierdbeiebakjes fan Fryske Strawberries. Mar koest ek in placemat, in stoepboerd en in entreeticket tsjinkomme. Yn totaal goed 15.000 produkten.
Lyts gelok wie der ek ’foar it hawwen’! Koest op ferskate mominten en plakken in ’gadged’ skoare mei in koarte tekst. Yn de kolleksje ûnder mear sokken, petsjes, blomsiedsjes, taskes, skriuwblokjes, bûsdoeken, kofjemokken, pinnen en boekelizzers. En dy wurde no droegen, siedde en brûkt troch de lokkige finers. Alles opteld gie it om 9.700 items.
Krekt as yn de earste edysje fan kultuermanifestaasje Arcadia, brochten wy ek no hûndert dagen lang in grut literêr projekt.…
Hûndert dagen Lyts gelok waard ek yn byld brocht. In part fan de foto’s koenen wy yn it foar al…
It wie in hiele toer, mar it is slagge om troch hûndert skriuwers in bydrage meitsje te litten en foar…
It moaie fan Lyts gelok is, dat de hûndert teksten noch altyd te lêzen binne. Lykas de hûndert ferhalen dy’t…