Keunstskilder Janine van Zeeland is ynspireare troch it greidlânskip om har hûs yn ‘e noardeasthoeke fan Fryslân hinne. Skriuwer Eppie Dam wie ûnder de yndruk fan har wurk yn ûngewoane kleuren en skreau der 42 gedichten oer. Se komme byinoar yn de tentoanstelling Een dier is ook maar een mens yn de Schierstins yn Feanwâlden.
De skilderijen en gedichten kinne bewûndere wurde fan sneon 3 july oant snein 15 augustus. It kultureel en histoarysk sintrum De Schierstins is iepen fan tiisdei oant en mei snein fan 13.30 oant 17 oere. De permaninte tentoanstelling Het Laatste Friese Torenkasteel en de Theun de Vrieskeamer binne ek iepen foar besikers.
De measte skilders hawwe each foar kij en hynders, mar Janine van Zeeland wurdt ek troffen troch hazzen, einen en yn ‘e tún fongen mollen. Se slagget der sels yn om miggen te fangen yn in prachtich skilderij. “De dieren moeten er een beetje onhandig en aandoenlijk uitzien”, seit de byldzjend keunstner út Kollumerpomp. Dêrnjonken falle it ûngewoane gebrûk en de helderheid fan de kleuren op.
Janine van Zeeland (Coevorden, 1956) wennet 16 jier yn Noardeast-Fryslân, en wie dêrfoar 30 jier learaar byldzjende fakken yn Swol. Se die har oplieding oan de ABK Arnhem (1993) en folge letter les by Ruud Venekamp, learaar oan de keunstakademy Minerva Grins, en by skilder Hendrik Elings.
De link mei Eppie Dam is net allinich de ynspiraasje dy’t hy yn har skilderijen fûn foar syn gedichten. Hy waard berne yn 1953 yn itselde doarp dêr’t sy no wennet. Hy hat sels gedichten skreaun yn Pompsters, it lokale dialekt dat ferbûn is mei de Grinslânske streektalen.
Eppie Dam, dy’t op it stuit yn Sleat wennet, is ongelooflijk alsidich as skriuwer. Hy publisearre dichtbondels en koarte ferhalen, skreau biografyen, berneboeken, liturgyske wurken en skreau ek kollums en resinsjes. Yn 2017 krige hy de heechste literêre priis yn Fryslân, de Gysbert Japicxpriis foar de dichtbondel Fallend Ljocht.
Mei tank oan in crowdfunding-kampanje binne bylden fan de skilderijen en de byhearrende gedichten bondele yn it boek Een dier is ook maar een mens, dat ek te krijen is yn De Schierstins. It boek is útjûn troch Uitgeverij Wijdemeer.
