Tekst: Meindert Talma | Oersetting: Martsje de Jong
Op skoalle mochten wy net tekenje ûnder de les,
mar dan makke ik mei myn foet yn ’e loft in skets.
Moaiheid sit in grap gauris yn ’e wei.
Minsken laitsje, ek as ik net wat grappichs sei.
Ik bin in laitsjende nihilist foar wa’t tekenjen
en skilderjen it belangrykste yn dit libben is.
As ik in dikke frou sjoch, krij ik drekt in soad sin
yn it meitsjen fan in nije tekening.
Mei slanke frouwen ha ik dat noait echt, trouwens.
Gelokkich wenje der yn Tilburg hast gjin slanke frouwen.
Ik bin in laitsjende nihilist foar wa’t tekenjen
en skilderjen it belangrykste yn dit libben is.
Nei’t ik destiids ôfstudearde
wie ik fuort ek in pensjonearde
Tekenjen is foar my nammentlik gjin berop
Dochs stean ik der alle dagen moarns seis oere spesjaal foar op.
Ik bin yn dy betide oeren wakker skerp en tûk
En ha dan binnen twa oeren in nije cartoon yn ’e broek
Krekt net ferskynde boeken dy’t noait yn in boekhannel bedarren
Puer op gefoel ha ik dêr in stik as hûndert fan byinoar sparre
Bygelyks Onbegrijpelijke boswandelingen
Fan de al jong ferstoarne skriuwer Ward B. Dunkin.
Ik bin in laitsjende nihilist foar wa’t tekenjen
en skilderjen it belangrykste yn dit libben is.
Ik wie al hiel betiid it leafste fan alles frij:
Echt net meidwaan mei de maatskippij.
Gjin gesin, allinnich in freondin en tekenje
En sa no en dan in moai skilderij.
Dit liet stiet yn it nije boek-mei-plaat ‘Gezinsverbijstering ‘ fan Meindert Talma. Talma (Surhústerfean, 1968) skriuwt dit jier it Fryske Kadoboek, dat op freed 1 novimber presintearre wurdt op it Frysk Boekefeest. ‘Wynroas’ is dêrnei yn de hiele Boekewike (2-10 novimber) fergees te krijen by oankeap fan in Frysk boek.
Foto: Reyer Boxem
Foto boppe-oan: Andrea Huls | Unsplash